“Einmaol Prins te zeen in Limburg mie lèndj …”. Frans Croonenberg zóng ’t vandaag, maondjig 6 februari, veur Prins Ben-1 van de Lombokkers! ‘N prachtig kadootje van Frans veur ózze nuuje Prins dae mit zien gevolg akte de presence goof op ’t Sjoenkelfieës in ’t MFC! En Ben vónj ’t geweldig!
Aafgelaope zaoterdig is de nuuje Prins oetgerope bie de Knoar en haet ‘r tot zunjig aovend laat neet mieë gesjlaope! Mer hae vonj ’t prachtig en nuuëdig uch allemaol oet óm ens good in de agenda van de Lombokkers te kieke en same mit häöm en zien prinses Carla d’r enne prachtige vastelaovend van te make!
Hae wilt speciaal effe wieze op ’t Sjoalcarnaval op vriedig 24 februari, ómdat dao de lokatie van gewijzig is. ‘T sjoalcarnaval zal namelik in ’t MFC plaatsvènje!! Kiek effe op de poster veur mieë informatie. En natuurlik op de Prinsereceptie op 17 februari in ’t MFC
Neet allein de groäte prins van de Lombokkers is aafgelaope zaoterdig oetgerope, mer auch Jeugprinses Sanne de Raef! Zie krit ein biezunjer plaetske in de anale van de Lombokkers, ómdat zie de ieëste Jeugprinses in ’t Lombokkersriek is! Sanne proficiat!
‘T prinselijk paar en Jeugprinses Sanne waere de ganse vastelaovend ter zieje gesjtange door hofdame Carla Wijnands en adjudant Ed Ploem. Ich mót zègke ze sjtónge d’r geweldig op allemaol! De vastelaovend is good begoosj!