Enne frisje wèndj wejt door ’t Lombokkers riek!
In de aanloup nao ’t kómmende vastelaovesseizoen leek ’t ós gepas óm ens ’n weurdje te gaon kalle mit veurzitter Peter Wijnands van CV de Lombokkers, de carnavalsvereiniging die regeert euver Berg aan de Maas en Nattenhaove.
Peter begint al geliek enthousias te vertèlle euver de planne die d’r bie de Lombokkers laeve. Hae wilt same mit de anger Lombokkers gaer de vastelaovend in Berg en Nattenhaove nao ein hoäger plan tille! In de huidige tied zowaar geine gemaekelikke opdrach! De luuj höbbe de keus oet versjeiene groäte vastelaoves evenemente in de buurt! Mer Peter en zien vastelaovesvrunj vènje det d’r auch luuj zeen die gaer ’n deil van de vastelaovend in eige dörp wille viere. En dao richte zie hun piele op!
“Veer organisere ós activiteite neet allein veur ószelf!”, aldus Peter. “Veer houpe in de toekoms veural ouch de luuj van Berg aan de Maas en Nattenhaove in de vastelaovend in eige dörp geïnteresseerd te kriege! En dan metname de Jeug!”
Peter geuf aan det ’t besjtuur van de Lombokkers inmiddels is oetgebreid van 3 nao 5 besjtuursleeje. Dao kump nog bie det de Lombokkers inmiddels ouch vrouwelikke leeje höbbe, terwiel det veurhaer alleein mer manne betróf! Zowaar ’n echte vernuujing wat bie deze tied huërt! Neet dan? D’r höbbe zich zelfs 6 vrouwluuj bie de Raod van 11 aangesjlaote!!!
Mer d’r vènje inmiddels nog mieë vernuujinge plaats. Zoä zeen de take van Veurzitter en Vors taegeweurdig vanein gesjeije en haet de Vors geine besjtuurlikke mach mieë bènne de Lombokkers. “De kèns de take ’n bietje vergelieke mit de Veurzitter van de Hermenie en de Tamboermaitre”, aldus Peter.
Op mien vraog wat eigelik de hoägtepunte van deze vastelaovend veur de Lombokkers gaon waere is Peter hieël duudelik. “Veur zowaal de vereiniging es veur de Prins is det eigelik jeder jaor ’t zelfde”, zaet hae. “Det zeen toch wal de oetreuping, de receptie en d’n optoch!” En op mien vraog wat eigelik de take zeen van enne Prins zaet ‘r: “De Prins haet eigelik mer 3 verplichte take! Hae mót op ’t Sjoälcarnaval sjlókzekskes of ’n anger attentie oetdeile; op d’n daag nao de oetreuping mót ‘r zörge veur sop en bruëdjes veur de luuj die zien hoes verseere en hae mót väöl gooj zin, väöl sjpas en väöl plezeer höbbe!”
“Es ver ’t toch euver de Prins höbbe”, zaet ‘r, “de Prins mót in zien regeringsjaor verplich lid waere van de Lombokkers! Hae betaald dan ouch geweun contributie, sjus wie jeder anger lid! Veur de res zeen d’r bienao gein extra koste aan ’t Prinsesjap bie de Lombokkers verbónje! ‘T Prinsepak en de sjlók dae wurt oetgegoäid zeen veur ruim 90% op koste van de Lombokkers! Det guldj trouwes auch veur de Jeugprins!”
De Lombokkers zeen inmiddels al volop aon de geng mit ’t beroemde beukske det in januari weer taege ’n vriewillige vergoeding hoes aan hoes wurt aangebaoje. ’T Oetgebreide programma van de Lombokkers kènt g’r trök vènje in de evenementen calender van 1Berg!
Peter geuf nog aan det luuj die interesse höbbe óm de Lombokkers te versjterke zich bie häöm kènne melje! Det gult ouch veur luuj die in de toekoms Prins of Jeugprins wille waere! (Mer dan waal det nemes ’t merk hè!).
Ich wil dit interview gaer aafsjloete mit de volgende wies weurt van Peter:
“Vastelaovend laevend hawte bevordert de laefbaarheid van ’t dörp!”
Wilt g’r nog mieë weite kiek dan ens op hunne site www.cvdelombokkers.nl of op facebook!